ມີນາຄົມ7

ພິທີສະເຫຼີມສະຫຼອງວັນແມ່ຍິງສາກົນ ວັນທີ 8 ມີນາ 2019 ຄົບຮອບ 109 ປີ ທີ່ວິທະຍາໄລຄູຄັງໄຂ ຄັ້ງວັນທີ 7 ມີນາ 2019.

ຊື່ຜູ້ຂຽນ ອາຈານ ວົງ ວິລະສອນ

      "ແດ່ວັນແມ່ສາກົນ ທີ 8 ມີນາ"
      ໝູນວຽນມາຮອດແລ້ວ       ມານດາແມ່ແຫ່ງປີ
8 ມີນາວຽນມາ       ມິ່ງມານດາໝາຍແມ້ງ
ນາລີແພງແຫ່ງເຈົ້າ       ຄາວໄດ້ໃຫ້ກຳເນີດ
ເປັນວັນເກີດຊື່ຊັ້ນ       ວັນເຈົ້າແມ່ສາກົນ ທ່ານເອີຍ
ແມ່ຄືຜູ້ບັງເກີດເກົ້າ       ມວນລູກຊີວາ


ແມ່ຄືຊີວາໄລ       ຮັກໄຄ່ຖະຫວາຍລໍ້າ
ແມ່ຄືທະລານໍ້າ       ຫຼາຍຍິ່ງບໍ່ເຫີຍຫ່າງ
ແມ່ຄືພະນາງຍອດຟ້າ       ນິດາເຈົ້າໄຄ່ພະຄຸນ ພຸ້ນໃດ
ຄຸນມານດາແມ່ນີ້       ໜັກເກິ່ງທໍລະນີ
ເພີ່ມລາສີຢຳແຢງນົບ       ຈິ່ງຈະດີເມືອໜ້າ
ສົມມາລາລື່ນອົ້ມ       ແມ່ຍິງລາວເຮືອງຮຸ່ງ
ໂຊດສະການມຸ່ງສ້າງ       ສິດກວ້າງອິດສະຫຼະພາບ ນັ້ນໃດ
ປາງຄາວກ່ອນກີ້       ມານດາແມ່ທໍລະມານ
ເຮັດແຕ່ວຽກເຮືອນຊານ       ບໍ່ມີສັດທະສຽງເວົ້າ
ປ້ອນເຂົ້າປາກລູກນ້ອຍ       ທຸກຄົນໃຫ້ກິນອີ່ມ
ທາງຫຼັງອອງອີ່ມອ້ອຍ       ອວນນ້ອຍແອ່ວກິນນົມ ເດນໍ
ມາຮອດຄາວຍຸກນີ້       ສັງຄົມໃໝ່ໃຫ້ສຳຄັນ
ດຸນລະຍາທຽມກັນ       ສິດສະເໝີພຽງເຈົ້າ
ເນົາແດນແວ່ນແຄວ້ນ       ນະຄະລິນທົ່ວລ່າ
ດອກມາລາຍົດໄດ້       ຈຳປາແທ້ແມ່ຍິງ ເຈົ້ານາ
ຂໍອວຍພອນສົ່ງໃຫ້       ມານດາແມ່ທັງຫຼາຍ
ຈົ່ງສຸກກາຍສຳລານ       ຫ່າງເຫີນໂລຄາຮ້າຍ
ຢ່າໄດ້ມາພານຕ້ອງ       ເວນຈ່ອງພະມານດາແມ່
ຂໍແກ່ສຸລິນພໍ່າຟ້າ       ພອນແກ້ວສິ່ງປະການ ນັ້ນທ້ອນ
ອີກຢ່າງຂໍໃຫ້ພໍ່າພ້ອມ       ເງິນຄຳໄຫຼຫຼັ່ງ
ມີປະທີບນຳທາງ       ເພື່ອນບໍລິບວນເຫຼື່ອມລົ້ນ
ມີຖະຫວິນຄົນນົບໄຫວ້       ເພັດນິນຈິນດາເຕັມຮ່າງ
ສຸດຕານາງເດັ່ນພ້ອມ       ສາມີແກ້ວໄຄ່ມະໂນ ແມ່ເນີ

ຜູ້ລົງຂ່າວ ໄມສຸກ ຢ່າງເຈຍມົວວັນທີ່ລົງຂ່າວ:24 ເດືອນ 3 ປີ 2019,






ມີນາຄົມ2

ເຜີຍແຜ່ໂຄງການ ແລະ ເຝິກອົບຮົມການນຳໃຊ້ປຶ້ມ ແບບຮຽນວິຊານິເວດສຸຂະສຶກສາ                         

ຊື່ຜູ້ຂຽນ ອາຈານ ວົງ ວິລະສອນ

ໃນເວລາ 8 ໂມງຂອງວັນທີ 2 ມີນາ 2019 ໄດ້ເປີດກອງປະຊຸມເຜີຍແຜ່ໂຄງການ ແລະ ເຝິກອົບຮົມການນຳໃຊ້ປຶ້ມແບບຮຽນວິຊານິເວດສຸຂະສຶກສາ ຂຶ້ນຢ່າງເປັນທາງການ. ພາຍໃຕ້ການເປັນປະທານຂອງທ່ານ ອາຈານ ວັນນີ ຢ່າງເຈຍມົວ ເລຂາຄະນະພັກຮາກຖານ ຜູ້ອຳນວຍການວິທະຍາໄລຄູຄັງໄຂ

ພ້ອມດ້ວຍການເຂົ້າຮ່ວມຂອງທ່ານ ຄຳໃບ ຄຳສີ ຮອງຫົວໜ້າກົມສ້າງຄູກະຊສວງສຶກສາທິການ ແລະ ກິລາ, ທ່ານ ສາສະດາຈານ ດຣ. ຕ່າກ່າຊິ ຮາຊະກຸລະ ຫົວໜ້າໂຄງການ ນິເວດສຸຂະສຶກສາ ແຫ່ງຍີ່ປຸ່ນປະຈຳ ສາທາລະນະລັດ ປະຊາທິປະໂຕປະຊາຊົນລາວ ພ້ອມດ້ວຍຄະນະ, ມີີຄູ-ອາຈານ ໃນວິທະຍາໄລຄູຄັງໄຂ ລວມທັງໝົດຈຳນວນ 30 ກວ່າທ່ານ. ການເຝິກອົບຮົມການນຳໃຊ້ປຶ້ມແບບຮຽນວິຊານິເວດສຸຂະສຶກສາໃນຄັ້ງນີ້ ທ່ານ ຄຳໃບ ຄຳສີ ຮອງຫົວໜ້າກົມສ້າງຄູກະຊສວງສຶກສາທິການ ແລະ ກິລາ ໃນບາງຕອນທ່ານໄດ້ກ່າວວ່າ ເພື່ອພັດທະນາວຽກງານການສຶກສາໃນວຽກງານສ້າງຄູ ເວົ້າລວມ ເວົ້າສະເພາະແມ່ນການສົ່ງເສີມການຈັດການຮຽນ-ການສອນ ໂດຍສົມທົບກັບການຈັດສະພາບແວດລ້ອມ ແລະ ສິ່ງເອື້ອອຳນວຍຄວາມສະດວກດ້ານສິ່ງແວດລ້ອມ ແລະ ສິ່ງເອື້ອອຳນວຍຄວາມສະດວກດ້ານສຸຂະສຶກສາ, ເພື່ອເຜີຍແຜ່ລົງສູ່ເດັກນັກຮຽນໃນໂຮງຮຽນສາມັນໃນເຂດບໍລິການທ້ອງຖິ່ນຂອງວິທະຍາໄລຄູຄັງໄຂ. ເພື່ອເຮັດໃຫ້ເນື້ອໃນຂອງກອງປະຊຸມເຝິກອົບຮົມໄດ້ຖືກຈັດຕັ້ງປະຕິບັດໃຫ້ປາກົດຜົນເປັນຈິງຮຽກຮ້ອງໃຫ້ບັນດາຄູ - ອາຈານ ຫຼືນັກສຳມະນາກອນ ແລະ ພາກສ່ວນທີ່ກ່ຽວຂ້ອງ ຈົ່ງພ້ອມກັນນຳເອົາເນື້ອໃນຂອງກອງປະຊຸມໄປຜັນຂະຫຍາຍໃຫ້ແກ່ຄູ - ອາຈານ ແລະ ນັກສຶກສາເຊິ່ງກັນແລະ ກັນ ເພື່ອນຳໃຊ້ເຂົ້າໃນການຮຽນ - ການສອນໃຫ້ມີປະສິດທິພາບ. ໃນທີ່ປະຊຸມບັນດາສຳມະນາກອນ ຫຼື ຄູ-ອາຈານ ແລະ ນັກສຶກສາກໍໄດ້ຮຽນຮູ້ບັນດາຫົວຂໍ້ຕ່າງໆ ເຊັ່ນ ການສະເໜີກ່ຽວກັບວິຊານິເວດສຸຂະສຶກສາ, ລາຍງານວຽກງານ Edu-port, ລາຍງານກິດຈະກຳທີ່ວິທະຍາໄລຄູຫຼວງພະບາງ, ສະເໜີວິທີສອນ ວິຊານິເວດສຸຂະສຶກສາໃນບາງບົດ. ນອກຈາກນັ້ນ, ໃນຕອນບ່າຍຂອງວັນທີ 1/2/2019 ຜ່ານມາ ບັນດາສຳມະນາກອນ ຫຼື ຄູ-ອາຈານ ແລະ ນັກສຶກສາກໍໄດ້ຮຽນຮູ້ ເພື່ອກຽມຄວາມພ້ອມຕື່ມອີກຄື ສະເໜີວິທີການກວດສຸຂະພາບ ແລະ ສາທິດການປະຕິບັດ, ເຝິກປະຕິບັດຕົວຈິງ ກັບນັກຮຽນສາທິດ ຊັ້ນປະຖົມປີທີ 5 , ຈຳນວນ 17 ຄົນ. ວິທະຍາໄລຄູຄັງໄຂວັນທີ 2 / 3 /2019

ຜູ້ລົງຂ່າວ ໄມສຸກ ຢ່າງເຈຍມົວວັນທີ່ລົງຂ່າວ:24 ເດືອນ 3 ປີ 2019<,



ອ່ານຕໍ່    4| | | 1 4| | | 2 | | |3 4| | | 3 | | |3 4| | | 4 | | |3 4| | | 5 | | |3 4| | | 6 | | |3

           4| | | 7 | | |3 4| | | 8 | | |3